Ta extende e fecha pa entrego di Registro di Personal 2023 y Necesidad pa trahador (Manpower Planning) 2024

ORANJESTAD – Departamento di Labor y Investigacion ta participa por medio di e comunicado di prensa aki cu a extende e fecha di entrego di Registro di Personal 2023 y Manpower planning 2024 pa tur empresa na Aruba. E fecha nobo ta bira diamars 30 april 2024.

Tambe kier recorda companianan cu no ta cumpli cu entrega di e Registro di Personal den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO lo bay over pa tuma accion contra esakinan. E compania lo por ricibi un sancion administrativo di Afl.

5.000,- pa no cumpli cu e obligacion di entrega di e Registro di Personal. Tene bon na cuenta cu den caso cu un Registro di Personal no ta corectamente yena, ta considera esaki tambe un incumplimento di parti di e compañía.

E Ordenansa Laboral 2013 (Arbeidsverordening 2013, AB 2013 no. 14) ta vigente desde 1 di april 2013. A base di articulo 28 y articulo 30 di e Ordenansa Laboral 2013 tur compania ta obliga di ta den pertenencia di un Lista Laboral (Arbeidslijst) y un Registro di Personal (Personeelsregister). E implementacion di articulo 28 y articulo 30 di e Ordenansa Laboral 2013 ta regla den e Decreto Nacional Registronan di Ordenansa Laboral 2013. E modelo di e Lista Laboral y Registro di Personal ta wordo regla den e Decreto Nacional menciona anterior y ta obliga e dunador di trabou pa entrega e Registro di Personal na Director di Departamento di Labor & Investigacion (DAO).

Den e formulario di e Registro di Personal 2023 (model 1A) ta indica e cantidad di personal registra den 2023. Den e formulario (consistiendo di dos parti) di e Manpower Planning 2024 ta identifica e necesidad pa personal den 2024 (Modelo 1B) y e necesidad di personal pa cada proyecto specifico den 2024 (Modelo 1C), manera ta wordo indica den Modelo 1B.

Desde aña pasa DAO a introduci un metodo nobo di entrega di e documentonan aki serca DAO. E metodo nobo aki ta ensera pa companianan, a traves di un portal cu su mesun login, haya aceso na LABORA e database di DAO unda cu por entrega/suministra e datos di e Registro di Personal y di e Manpower Planning. Aki e compania por haya aceso na nan datos na cualkier momento. Si bo ta desea pa participa den e metodo nobo aki por manda un email pa Sr. Simon Brete (simon.brete@aruba.gov.aw).

Registro di Personal 2023 y Manpower Planning 2024

E unico forma cu por entrega e Registro di Personal ta den e forma digital. Desde 8 februari 2024 por download e formulario digital (cual ta consisti di 2 Excel-file) for di website www.daoaruba.com of www.gobierno.aw (Excelsheet template: DAO Personeelsregister 2023 y DAO Personeelsbehoefte 2024), of por haci un peticion via e-mail na aanvraagpr@gmail.com y DAO lo mail bo e dos Excelsheet. Nos ta pidi pa lesa e splicacion atentamente momento cu ta bay yena e Excelsheet. Tambe ta haci un peticion pa momento cu ta yena e informacion pa verifica cuidadosamente e detayes di e empleo pa asina sigura cu esaki ta coresponde cu bo administracion y e payslip.

Unda y con por entrega e Registro di Personal 2023 y Manpower Planning 2024 DAO ta haci un peticion pa hinca e datonan den e formulario digital, segun e modelo stipula pa ley, y pa manda nos esaki na e-mailadres arbeidsmarktaruba@gmail.com . Den caso cu bo compania tin un of mas sucursal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. KvK-nummer 5555.0) pero tambe pa cada sucursal (p.e. KvK-nummer 5555.1, 5555.2 etc.). Ta pidi tambe pa indica cua trahadonan ta rouleer door di pone un strea (*) den kolom patras di e kolom “No.” ariba e formulario digital.

DAO ta informa cu ta obligatorio pa yena tur 3 modelo. Den caso cu no tin necesidad pa personal of necesidad pa personal pa cada proyecto specifico pa 2024, ta yena nihil ariba modelo 1B y modelo 1C.

DAO lo mandabo via e-mail un comprobante cu a ricibi e formulario di Registro di Personal 2023-2024. Tene cuenta cu e comprobante di entrega no ta implica aprobacion di e Registro di Personal 2023- 2024. DAO lo duna durante aña 2024 aprobacion of desaprobacion di e Registro di Personal 2023-2024.

Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.

Si tin mas pregunta tocante e Registro di Personal por tuma contacto cu Sra. Louisetty Croes na 523-7722 of via email louisetty.croes@aruba.gov.aw of cu un funcionario di Bureau Arbeidsmarktonderzoek na 523-7720.