Participacion di e hende muher riba mercado laboral di Aruba ta evidente

E mensahe di ‘International Labor Organization’ (ILO) pa Dia Internacional di Hende Muher 2022 ta pa inverti mas den cuido pa tur hende. Ta ser rekeri di empresanan y di gobierno nan pa inverti den cuido y den servicionan cu ta beneficia trahadornan, muchanan, famia nan, negoshinan y sociedad, y cu ta sirbi pa promove mas igualdad di genero na pia di trabou. Ta mundialmente conoci cu e hende muher ta esun cu ta wordo poni na encargo di cuido di e famia y cu ta wordo encarga cu e tareanan di e hogar. E forma di cuido aki ta ser concidera como un encargo laboral cu no ta wordo haci contra pago y ta creciendo den reconocimento.  

Departamento di Labor y Investigacion (DAO) ta comparti e mensahe di ILO y den e cuadro aki ta presenta algun estadistica recien riba e posicion di e hende muher cu ta actualmente forma parti di Aruba su mercado laboral.

Departamento di Labor y Investigacion ta felicita tur hende muher riba e dia aki cu nan logronan extraordinario y nan contribucion pa cu e economia di Aruba. E pandemia di COVID-19 a stroba e progreso laboral di e hende muher, sinembargo cu positivismo y perseverancia pronto lo recupera di e periodo dificil aki y lo continua di prospera. DAO ta continua cu su esfuerso pa proteha y optimisa e posicion di e hende muher riba nos mercado laboral.



Leave a Reply