Participa cu Encuesta Forsa Laboral 2021!

Desde dialuna 1 di November 2021 Departamento di Labor y Investigacion (DAO), Oficina Central di Estadistica (CBS) y Centrale Bank di Aruba (CBA) a cuminsa cu e di diesun (11) Encuesta di Forsa Laboral (EFL 2021). E EFL 2021 ta tuma lugar den forma digital y via telefoon y ta wordo ehecuta na un forma similar na Censo 2020. Pa e EFL 2021 a escohe un muestra di adresnan reparti riba henter Aruba cu a participa na Censo 2020 y cu a indica cu nan lo kier sigui traha hunto cu CBS pa futuro investigacionnan.

Participantenan a ricibi dialuna ultimo (1 november) un e-mail cu un link pa yena e cuestionario online, for di CBS unda tambe ta duna mas splicacion riba e investigacion. Nos ta pidi encarecidamente na tur esnan cu a yena nan e-mail durante Census 2020, pa controla nan e-mail, tambe den junk mail, pa verifica si nan a ricibi un e-mail di CBS. E e-mail a wordo manda for di LFS2021@cbs.aw.

E cuestionario ta facil pa yena. Click riba e link den e e-mail y esaki ta habri y or cuminsa contesta e preguntanan. No lubida na final pa click riba e sign di FINISH pa asina e formulario wordo entrega digital. Na tur esnan cu tin pregunta, of tin duda den kico pa contesta na algun pregunta, of esnan cu ta desea di haña un yudansa pa yena e cuestionario, por yama: 524 7400 (lo yama bo persona bek!) of manda un e-mail na: LFS2021@cbs.aw.

Personanan cu durante di Censo 2020 a indica cu nan kier coopera cu investigacionnan cu CBS pero no tabata tin un e-mail, lo wordo yama pa yena e encuesta via telefon. E encuesta mester wordo yena pa tur persona den e hogar. Esnan di 15 aña bay ariba lo haya preguntanan relata na educacion, labor y entrada segun principionan di e Organisacion Internacional di Labor (ILO) ya cu nan ta wordo considera como parti di e forsa laboral di un pais.

E team di LFS2021 ta telefonicamente disponibel pa contesta cualkier pregunta cu tin, y tambe nan por asisti den e yenamento di e cuestionario. Nan lo ta disponibel di dialuna pa diabierna for di 8:00am – 12:00pm y di 2:00pm pa 8:00pm, den weekend for di 12:00pm pa 06:00pm na number di telefon: 524 7400 (puntra pa e team di EFL 2021). Si yama y e liña ta ocupa, sigui haci intento pa haya un persona na liña. Tambe por manda un e-mail na: LFS2021@cbs.aw cu bo preguntanan, of pa solicita pa un cita pa yena e cuestionario via telefon.

E EFL 2021 tin como meta pa forma un imagen actual y completo di e mercado laboral di Aruba. Pa medio di e informacion compila tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di esnan emplea, esnan no emplea y esnan cu no ta activo riba e mercado laboral.

Privacidad

Tur informacion lo wordo procesa anonimo y lo ser publica solamente den forma agrega. E privacidad di cada paersona y hogar ta wordo garantisa pa DAO, CBS y CBA. Nos ta gradici bo persona di antemano pa bo participacion na e EFL 2021. Pa mas informacion riba e Encuesta di Forsa Laboral 2021, bo por tuma contacto cu nos libremente na number di telefon 524 7400.