Dicon ta importante pa introduci un salario minimo pa ora?

ORANJESTAD- Minister di Labor mr. Wendrick Cicilia conhuntamente cu Departamento di Labor y Investigacion (DAO) ta anuncia introduccion di un salario minimo pa ora entrante 1 di januari 2026 pa asina kita e discrepancia entre e empleadonan cu ta traha 40 ora pa siman y e empleadonan cu ta traha mas cu 40 ora pa siman.

Entrante 1 di januari 2026 ta bira obligatorio cutur empleado di 18 aña of mas, cu ta gana e salario minimo, mester gana por lo menos e salario minimo pa ora sin importa e cantidad di ora cu e ta traha pa dia, pa siman of pa luna. Entrante 1 di januari 2026 e salario minimo pa ora.ta Afl. 11,58.

E cambionan entrante 1 januari 2026 ta: introduccion di un salario minimo pa ora di Afl. 11, 58 pa tur empleado desde18 aña independiente di cuanto ora e ta traha y e funcion cu e ta eherce.

Tambe ta ahusta e factor cu ta uza pa e calculacion pa un salario pa luna y ta bira 4,333. Esaki ta nifica cu un empleado cu ta traha 40 ora pa siman y ta wordo paga awor un salario minimo di Afl. 1986,20 pa luna, entrante 1 di januari 2026 lo mester ricibi un salario di Afl. 2007,50.

Ken tur mester duna atencion na e cambio di ley aki entrante 1 di januari 2026?
Pa controla si un empleado ta cay bou di e ley, e salario pa ora mester ta conoci. Si e salario ta mas abou cu e cantidad legalmente estableci di Afl. 11,58, e salario pa ora mester keda ahusta entrante di 1 di januari 2026. Empleadonan cu ta gana un salario pa ora mas halto cu e salario minimo pa ora di Afl. 11,58 no ta cay bou di e ley aki. Tur empleado cu tin actualmente un salario mensual di Afl 2257,93 of mas abou, mester haci uzo di e formulanan aki bou pa asina por determina si e cambio di ley aki ta aplicabel p’e.

Con ta calcula e salario minimo pa siman of pa luna?

Pa calcula e salario minimo pa siman lo uza e siguiente formula:

        Salario pa siman = cantidad di oranan di trabou pa siman x salario minimo pa ora.

Pa calcula e salario minimo pa luna lo uza e siguiente formula:

        Salario pa luna = cantidad di oranan di trabou pa siman x salario minimo pa ora x factor 4,333

Pa ricibi mas informacion riba e salario minimo pa ora cu ta drenta na vigor 1 januari 2026, por haci uzo di e siguiente instrumentonan:

• E link pa SUELDO app (DAO calculator salario minimo pa ora): https://daoaruba.com/index.php/sueldo/
• Documento Frequently Asked Questions (FAQ) riba e salario minimo pa ora disponibel den diferente idioma riba e website di DAO: www.daoaruba.com.
• Documento Frequently Asked Questions (FAQ) pa e grupo specifico di personal domestico riba e salario minimo pa ora disponibel den diferente idioma riba e website di DAO: www.daoaruba.com.
• Por email na : dao.uurloon@gmail.com of por manda un WhatsApp:5936934 (solamente pa pregunta riba salario minimo pa ora).
• Por yama na tel: 5237720 of por bishita oficina di DAO situa na Paardenbaaistraat 11 entre 7:30 am pa 12:00 pm y 1:00 pm pa 3:00 pm.