Entrega di bo necesidad di personal (Manpower Planning) 2026

DAO ta informa pa medio di e comunicado di prensa aki cu e periode pa entrega bo necesidad di personal pa aña 2026 a habri desde 5 december 2025. Desde aña 2023 a introduci un metodo nobo cu ta dinamico, flexibel y transparente pa colecta y publica e Manpower Planning (necesidad di personal) a corto y a largo plaso riba e mercado laboral y ta pidi bo cooperacion den esaki.

E necesidad di personal (Manpower Planning) tin su base legal den e Ordenansa Laboral 2013 (Arbeidsverordening 2013, AB 2013 no.14) cual ta vigente desde 1 di april 2013. Un dunado di trabou tin e obligacion, a base di articulo 30 punto 1 di e Ordenansa, pa manda un Registro di Personal riba peticion di e Director di e Departamento di Labor & Investigacion (Directie Arbeid & Onderzoek, DAO).

Pa entrega di e necesidad di personal (Manpower Planning) por haci uso di e portal di e database Labora di DAO. Via e portal aki por entrega e Registro di Personal y e Manpower Planning. Via e portal aki un compania por mira su informacion directo cu ta registra na DAO. E entrega di e Registro di Personal por wordo entrega desde comienso di aña 2026. Esaki ta encera informacion di personal di bo compania te cu 31 december 2025. E entrega di e Manpower Planning informacion ta desde 5 december 2025. Den e formulario cu mester yena riba e portal, mester indica e necesidad di personal pa e aña venidero den un empresa y tambe den e mesun formulario ta indica e necesidad di personal en conexion cu un proyecto specifico pa e aña venidero.

DAO ta informa cu por sigi entrega necesidadnan nobo, of cambionan of adicionnan riba e Manpower Planning (e necesidad di personal) indica di bo compania durante e aña 2026 via e portal di Labora of si bo no tin acceso riba e portal ainda, bo por entrega via un Excel sheet y manda esaki na email: dao.labora@aruba.gov.aw . Desde 5 di december 2025, lo por download e Excel sheet for di e website www.daoaruba.com of www.gobierno.aw (Excel sheet:DAO Personeelsbehoefte 2026) of bo por pidi esaki via email na aanvraagpr@gmail.com, y DAO lo mand’e pa bo via email.

DAO tin varios companianan cu ya tin nan aceso riba portal di e database LABORA. Si bo ta desea di ricibi bo login informacion pa subi e portal, por manda un email pa sr. Simon Brete (simon.brete@aruba.gov.aw) of por yama na 5237718.

Publicacion di necesidad di personal (Manpower Planning) riba website di DAO

E Manpower Planning colecta di companianan den aña 2026 lo wordo analisa cada kwartaal den 2026 y lo wordo publica na forma anonimo y na e nivel macro. Esaki ta wordo publica den e prome siman di e siguiente luna despues cu e periodo di entrega finalisa. E analisis ta concentra riba e tendencianan y conocimentonan necesario pa cu e sectornan y funcionnan di e necesidad di personal indica. E resultado di e Manpower Planning pa cada kwartaal lo wordo publica riba e website di DAO (www.daoaruba.com) y ta contribui na un mihor comprondemento di e dinamica di e personal riba e mercado laboral y ta sostene e planificacion strategico como tambe desaroyo di maneho pa cu gobierno y Minister encarga cu Labor.

Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.

Si tin pregunta, por tuma contacto cu sr. Simon Brete na number di telefon 5237718 of via email simon.brete@aruba.gov.aw of cu sra. Louisetty Croes na number di telefon 5237722 of via email louisetty.croes@aruba.gov.aw.