Compromete na un of mas meta y inspira otronan cu bo miho practicanan

ORANJESTAD: Comision Nacional di SDG na Aruba ta anuncia cu durante e siman di 19 pa 25 di september 2024 lo ta celebrando SDG Week. Durante di e siman aki lo tuma lugar un campaña pa aumenta concientisacion riba e Metanan pa Desaroyo Sostenibel (SDG). Nos ta invita tur companianan, organisacionnan non profit, sector publico, y individuonan pa uni y pa por contribui na un futuro mas sostenibel pa Aruba. Cambio pa un miho Aruba solamente ta posibel na momento cu nos tur hunto crea un compromiso.

Na cua di e SDG bo lo compromete pa un aña?

Comision Nacional di SDG ta invita cada individuo, compania of organisacion non-profit pa scoge e SDG di nan preferencia y compromete pa traha riba dje durante di un aña. Por haci esaki door di yena e Pledge Form via di e siguiente link: https://forms.gle/gx7YJfsCRWC9PnQK6 cu ta disponibel riba e Facebook y Instagram di SDG Aruba.

Comparti bo miho practicanan y inspira otronan

Alabes nos ta invita pueblo completo pa comparti nan miho practicanan y success stories di SDG riba nan rednan social y tag SDG Aruba uzando e hashtags #SDGAruba y #SDGWeekAruba2024. Door di comparti e miho practica y logronan riba medionan social nos ta crea un ola di inspiracion pa otronan, con pa contribui na e sostenibilidad di nos pais y mundo henter.

Logo y material di SDG na Papiamento

Nos ta encurasha tur compania, organisacion y individuonan pa bishita e website di SDG Aruba y download e toolkit pa asina por haci uzo di tur e logonan y tiles traduci na Papiamento y otro idiomanan. Den caso cu tin pregunta semper por tuma contacto via email na info@sdgaruba.com.

Kico ta SDG of e Metanan Mundial pa Desaroyo Sostenibel?

Hopi biaha ta confundi sostenibilidad cu solamente medio ambiente, con pa combati cambio climatico of cu e tin di haber cu reciclahe unicamente. Pero e 17 Metanan Mundial pa Desaroyo Sostenibel (SDG) di Nacionnan Uni ta cubri hopi mas! Trahando riba 1 of mas SDG ta yuda mehora e bida pa tur hende, no solamente den e area di medio ambiente sino tambe bienestar social, prosperidad y paz pa un y tur. E 17 metanan ta interconecta cu otro y ta wordo parti den 5 pilar cu ta fundamental pa logra un futuro sostenibel:

• Hende: ta dirigi pa Caba cu Probesa, Caba cu hamber, Salud y bienestar, Enseñansa di calidad, Igualdad di genero y Garantisa igualdad pa tur hende.
• Planeta: ta enfoca riba e contribucion critico cu nos naturalesa ta duna na bida humano y ta reconoce e estado actual di nos medio ambiente: Awa limpi, Accion riba clima, Bida bou awa, Bida riba tera, Energia limpi y economico
• Prosperidad: ta enfoca riba garantisa cu tur hende por disfruta di un bida prospero y satisfactorio y cu progreso economico, social y tecnologico ta bay man: Energia limpi y economico, Trabou decente y crecemento economico, Innovacion y Infrastructura, Reduci desigualdad, Produccion y consumo responsabel, Barionan y comunidadnan sostenibel
• Paz: ta enfastisa riba sosiedadnan inclusivo y husto, na unda paz ta reina, dunando acceso na husticia pa tur hende y ta construi institucionnan efectivo, responsabel y inclusivo na tur nivel.
• Partnership: ta pidi pa fortalece e formanan di implementacion y pa construi y mehora asosiacionnan cu diferente stakeholder.

Nos ta invita Aruba completo pa compromete na un of mas SDG, comparti e mihor practicanan, inspira otronan y haci un diferencia real pa nos isla, nos hendenan y pa futuro generacionnan!

Unicamente door di uni nos por logra un pais mas fuerte, husto, duradero y placentero pa un y tur.