Departamento di Labor y Investigacion (DAO) kier investiga factornan cu ta di influencia riba e escogencia di e empleador pa (un) cierto tipo(nan) di contracto laboral den su negoshi

ORANJESTAD – Desde 27 januari 2023 empresarionan ta wordo invita pa participa na un encuesta digital. E meta di e encuesta ta pa obtene un mihor bista riba e factornan cu ta di influencia riba e seleccion y uzo di cierto tipo(nan) di contracto laboral pa e ‘dunado di trabou’.
E leynan laboral actual ta permiti uzo di diferente contracto.
Contracto laboral: un contracto entre e ‘dunado di trabou’ y e ‘trahado’ unda e ‘trahado’ ta den servicio di e ‘dunado di trabou’ contra pago di salario durante cierto oranan (articulo 7:610 Codigo Civil di Aruba)
Contracto di tuma trabou; un contracto entre un ‘contratista’ y un ‘cliente’ pa haci cierto trabou di indole material (p.e. construccion di un cas) cu lo wordo paga door di e ‘cliente’ sin cu tin un relacion laboral (articulo 7:750 Codigo Civil di Aruba)
Contracto di realisa cierto servicionan: un contracto entre un ‘profesional’ y un ‘cliente’ pa haci cierto trabou di indole intellectual como un servicio na e ‘cliente’ contra pago sin cu tin un relacion laboral (p.e. notario, abogado, consultant, accountant etc.) (articulo 7:400 Codigo Civil di Aruba).

E investigacion ta enfoca su mes solamente riba e ‘contracto laboral’, ciendo e contracto abase di cual trabounan ta wordo realisa, cual por ta:
E contracto laboral pa tempo indefini (vast contract/ contract voor onbepaalde tijd)
E contracto laboral pa tempo defini (tijdelijk contract/ contract voor bepaalde tijd)
E contracto laboral entre un ‘empleado temporal’ y un ‘agencia di empleo temporal’ (uitzendovereenkomst)
Oproepcontract (p.e. nul-urencontract, min-maxcontract)
E contracto laboral ta un elemento essencial den un relacion laboral pasobra aki den e condicion nan di empleo mas importante entre e ‘dunado di trabou’ y e ‘trahado’ ta wordo stipula, manera p.e. e funcion di e empleado, e salario, e orario di trabou y e duracion di trabou. Den practica e tipo di contracto laboral mas comun ta e contracto pa tempo indefini.

Bo participacion como empleador na e encuesta aki ta sumamente importante pa motibo cu e informacion cu ser ricibi lo contribui na un miho bista di e desaroyonan riba e mercado laboral.
Pa e motibo ariba menciona DAO lo aprecia bo participacion pa cu e investigacion. E duracion pa completa e encuesta ta entre 5 pa 10 minuut y DAO ta pidi bo persona pa haci esaki prome cu 27 di februari 2023.

Pa participa na e encuesta por copia e link akibou y plak esaki den bo browser.

Version Hulandes:
https://nl.surveymonkey.com/r/DAO2023

Version Ingles:
https://www.surveymonkey.com/r/DAO-2023

Bo participacion na e encuesta ta completamente voluntario. Tur informacion ricibi ta wordo trata diligente y confidencial y e resultado di e investigacion lo ser publica den forma agrega.
Pa mas informacion por tuma contacto cu Bureau Arbeidsmarktonderzoek (BAO) riba number di telefon 523-77-20 of via e-mail mandy.lacle@aruba.gov.aw.