Aumento salario minimo y limite di salario Ordenansa Laboral 2013

Ministerio di Labor, Energía & Integracion
Departamento di Labor & Investigacion
ta anuncia aumento di salario minimo y e limite di salario pa aplicacion di e Ordenansa Laboral 2013 entrante 1 januari 2023

ORANJESTAD – E suma di salario minimo pa un empleado cu tin 18 aña di edad of mas ta bira entrante 1 januari 2023, Awg. 1.893,40 pa luna y Awg. 441,60 pa siman.
Pa un empleado di 18 aña of mas cu ta haci trabou domestico den un residencia priva, e salario minimo ta bira Awg. 883,35 pa luna. Pa e empleado domestico cu ta traha 22 ora of menos pa siman e suma di salario minimo lo bira Awg. 9,85 pa ora. Esaki ta nifica cu e salario minimo ta conoce un aumento di Awg. 78,05 pa luna. Pa e empleado domestico esaki ta un aumento di Awg. 36.43.

Como consecuencia di e ahustacion di e salario minimo e limite di salario pa aplicacion di e Ordenansa Laboral 2013 (Arbeidsverordening 2013) tambe lo subi entrante 1 di januari 2023. E Ordenansa Laboral 2013 ta e ley cu ta regla condicionnan di trabou manera entre otro e oranan maximo cu por traha pa dia of pa siman, dianan di sosiego, pago di overtime ora traha mas cu e máximo ora permisibel ariba un dia normal di trabou y pago di overtime riba dianan di fiesta.
E Ordenansa Laboral no ta aplicabel pa tur trahado pero ta conta solamente pa trahadonan cu ta cai bou di e limite di salario.

E limite di salario nobo lo bira entrante 1 di januari 2023, e salario minimo
(Awg. 1.893,40) x e factor 2.5= Awg. 4.733,50. Esaki ta ensera cu trahadonan cu ta gana un salario di Afl. 4.733,50 pa luna of Afl. 56.802,00 pa aña of menos, ta cai bou di proteccion di e Ordenansa Laboral 2013 y tin derecho riba tur e condicionnan di trabou stipula den e ley aki.

Departamento di Labor y Investigacion ta pidi tur trahado y principalmente dunadonan di trabou pa tene bon cuenta cu e cambionan