- September 9, 2026
- Posted by:
- Categories: Minimumuurloon, Nieuws
ORANJESTAD – Minister di Labor mr. Wendrick Cicilia conhuntamente cu Departamento di Labor y Investigacion (DAO) ta anuncia cu a amplia e aplicacion “SUELDO” y awo ta disponibel den cuater (4) idioma: Hulandes, Papiamento, Ingles y Spaño.
Cu e contribucion aki, unda por calcula e salario minimo pa ora den e idioma preferi, Ministerio di Labor y DAO kier duna un servicio mas accesibel y eficiente na tur trahadonan y dunadonan di trabou na Aruba, permitiendo nan pa haya informacion completo y confiabel.
A desaroya e SUELDO app ta specialmente pa duna informacion y guia durante e transicion pa e introduccion di e salario minimo pa ora, cu a drenta na vigor dia 1 di januari 2026 cu un tarifa di Afl. 11,58 pa ora. E app ta duna tanto e trahadonan como e dunadonan di trabou un indicacion rapido y facil pa controla si a aplica e cambio di ley. Lo sigui desaroya e SUELDO app den futuro pa por sirbi como un ‘tool/herment’ pa facilita e trahadonan pa controla nan salario ricibi.
Servicio na comunidad multilingüe
Aruba ta un comunidad multilingual y diverso. DAO kier sigura cu ningun trahado of dunado di trabou ta keda sin acceso na e informacion corecto debi na barera di idioma. E adicion di e 3 idiomanan nobo (Papiamento, Ingles y Spaño) banda di e idioma original (Hulandes) ta garantisa cu hopi ciudadano y residente por calcula y verifica nan derecho y obligacion laboral sin dificultad.
E app ta accesibel directamente via e link:
https://daoaruba.com/index.php/sueldo/
Instrumentonan adicional y contacto
Banda di e SUELDO app, Ministerio di Labor y DAO ta recorda cu tin mas instrumento disponibel pa sostene e comunidad laboral:
- Documento FAQ General (Hulandes, Papiamento, Ingles y Spaño): Preguntanan mas frecuente tocante e salario minimo pa ora disponibel den diferente idioma riba: www.daoaruba.com.
- Documento FAQ pa Personal Domestico (Hulandes, Papiamento, Ingles y Spaño): Guia specifico pa trahadonan domestico y nan dunadonan di trabou disponibel den diferente idioma.
- Formulanan di calculo:
- Pa siman: Cantidad di oranan di trabou pa siman × Afl. 11,58.
- Pa luna: Cantidad di oranan di trabou pa siman × Afl. 11,58 × factor 4,333 (e.g., 40 ora pa siman ta ekivalente na Afl. 2007,05 pa luna desde 1 di januari 2026).
Keda bon informa riba bo derechonan y debernan laboral
Pa cualkier pregunta of consulta por tuma contacto cu DAO via e siguiente canalnan:
- Tienda Legal Laboral (Consulta y Asistencia):
- Localidadnan: MFA Savaneta y MFA Paradera
- Email: dao.tll@aruba.gov.aw
- Telefon: 523-7770 (Savaneta) | 523-7750 (Paradera)
- Contacto General di DAO:
- Email: dao.uurloon@gmail.com
- Telefon: 523-7720