HomeNieuwsNieuwsDepartamento di Labor y Investigacion hunto cu Minister di Turismo, Transporte y Labor, mr. Wendrick Cicilia ta habri di dos localidad di ‘Tienda Legal Laboral’ na MFA Paradera

Departamento di Labor y Investigacion hunto cu Minister di Turismo, Transporte y Labor, mr. Wendrick Cicilia ta habri di dos localidad di ‘Tienda Legal Laboral’ na MFA Paradera

  • May 25, 2026
  • Posted by:
  • Category: Nieuws
No Comments

ORANJESTAD, Aruba – Dialuna 25 di mei 2026, Directie Arbeid en Onderzoek (DAO) ta anuncia cu ‘Tienda Legal Laboral’ (TLL) a habri su di dos localidad na MFA Paradera. E soft opening di e proyecto piloto aki ta marca un paso importante den e mision di DAO pa haci conseho laboral y informacion preventivo mas accesibel pa tur ciudadano.

Di conflicto pa prevencion

E lansamento di Tienda Legal Laboral ta hopi mas cu un cambio di nomber; e ta representa un forma nobo y proactivo di traha. Caminda antes e enfoke tabata riba soluciona conflictonan laboral cu a surgi caba, TLL ta fungi awor tambe como un centro di informacion central cu ta enfoca riba prevencion. Door di informa trahado y dunado di trabou den un fase trempan tocante nan derechonan y debernan, TLL ta aspira na un mercado laboral mas sano y transparente na Aruba.

Accesibilidad den bo bario

Un punto clave di e proyecto piloto aki ta e accesibilidad. Door di ta presente fisicamente den bario, DAO ta baha e drempel pa haya conseho significativamente. Cu e localidad nobo aki, strategicamente situa na MFA Paradera, mas hende por haya sosten cerca di nan cas of trabou. Banda di e prome localidad na MFA Savaneta, e di dos localidad na MFA Paradera (Paradera 145-C) ta ofrece e posibilidad pa brinda sosten den un ambiente neutral y di confiansa.

Intake y Servicio

Tienda Legal Laboral ta basa su servicio riba cinco pilar: Husto, Profesional, Servicial, Uniforme y Accesibel. Sea ta trata di pregunta tocante pago di salario, contract laboral of mediacion den caso di conflicto; TLL ta cla pa yuda tanto trahado como dunado di trabou.

Intake cuminsando diamars 26 di mei

Pa mantene e drempel mas abou posibel, TLL lo funciona a base di ‘intake’. Nos lo purba atende ciudadanonan mesora segun disponibilidad. Si esaki no ta posibel, nos ta yuda traha un cita pa un otro momento.

Cuminsando diamars 26 di mei, e siguiente orarionan di pa intake lo ta vigente na MFA Savaneta y MFA Paradera:

  • Dialuna – Diabierna: 08:00 – 12:00 & 13:00 – 15:00
  • Diaranson: 08:00 – 12:00

Localidad y Contacto

Nos ta invita comunidad pa bin conoce e forma nobo aki di servicio. Pa mas informacion, bo por bishita nos localidadnan of tuma contacto via e datonan aki bou:

Departamento di Labor y Investigacion ta invita e comunidad completo pa bin cera conoci cu e forma nobo di servicio aki. Hunto nos ta traha riba husticia na pia di trabou, den bo bario.