Dunamento di pecho y un luga apropia pa haci esaki

Un empleado femenino cu ta cria su yiu na pecho tin derecho di interumpi su trabou pa cumpli cu e dunamento di pecho a base di articulo 657c Codigo Civil.

Den un resumen cortico articulo 657c Codigo Civil di Aruba ta bisa lo siguiente:

• E ser femenino tin derecho di interumpi su trabou pa duna su yiu pecho of pa kolf e lechi di pecho;
• E mag di haci esaki durante e prome 9 lunanan di bida di su yiu;
• E dunado di trabou mester duna e empleado e posibilidad aki como tambe pone un lugar apropia pa haci esaki;
• E interupcion akiriba menciona ta tuma luga ora ta necesario pero no mas cu ¼ parti di e orario di trabou palabra;
• E orario di interupcion y e duracion di esaki ta wordo determina despues di a consulta cu e dunado di trabou;
• Durante e interupcion aki e empleado ta mantene su salario.

Segun e Memoria di Aclaracion e dunamento di pecho directo na e yiu of e kolfmento di e lechi ta tuma luga na trabou mes. Esaki ta encera cu lo mester stipula un luga apropia caminda e empleado por haci esaki den tur trankilidad. Un luga apropia lo mester dispone minimo di e siguiente rekisitonan:

• E lugar mester ta limpi y nan un temperatura agradabel;
• E lugar mester ta uno ful priva (no un baño publico) y cu un entrada cu ta cera na lock di paden;
• Un stoel confortabel cu ta duna suficiente suporte na lomba;
• Un stopcontact caminda por conecta un breast pump electrico;
• Un mesa caminda por pone e breast pump y otro acesorio cu tin mester;
• Mester ta cerca di un laba mano aunke no ta exigi pa esaki ta den e camber mes;
• Mester ta cerca di un frishider caminda lo por warda e boternan di e lechi cu a kolf.

Tene cuenta cu e dunado di trabou no por obliga e empleado pa kolf na trabou si e empleado lo kier duna pecho.

Si un dunado di trabou no por pone un luga apropia na su negoshi, e empleado lo mester yega na un areglo cu su dunado di trabou riba e dunamento di pecho. Por ehempel e empleado lo por combini cu e dunado di trabou cu e por sali un rato pa bay duna su yiu pecho of kolf e lechi un otro caminda. Semper y cuando esaki ta keda cerca di trabou y ta cumpli cu e interupcion di no mas cu ¼ parti di e orario di trabou. Ta recomendabel pa uza e tempo di ¼ parti preferiblemente durante henter e dia (por ehempel cuminsa traha un tiki mas laat, tuma pausa merdia un tiki mas largo y stop di traha un tiki mas trempan) pa stimula e produccion di lechi materno teniendo na cuenta si esaki ta posibel segun e tipo di funcion y compania.

Corda cu e motibo principal di e derecho aki ta pa apoya y stimula dunamento di pecho y no simplemente un oportunidad pa traha menos cu normal!