Onze Locatie

Arbeidsverordening 2013

1. Mi dunador di trabou por kita mi dia liber den siman pa dunami un diadomingo liber pa luna?

Den 1 siman di trabou (7 dia tras di otro) un trahador mester tin por lo menos un full dia liber. Den e siman cu e trahador mester hanja su diadomingo liber e dunador di trabou no por cambia su dia den siman pa e hanja diadomingo mirando cu e trahador lo surpasa su oranan di trabou maximo pa siman. Den casonan asina e di 7 dia mester wordo paga na overtime.


2. Pa un trahador cu su salario ta varia pa luna (p.e. e tin un salario basico plus comision) y cierto lunanan e ta riba e limite di salario, e Ordenansa Laboral ta conta un luna si y otro lunanan no?

E limite di salario pa aplicación di e reglanan di e Ordenasa Laboral ta 2.3 x salario minimo (Afl. 1.711,15) = afl. 3.935,65 pa luna. Pa trahadornan cu nan salario ta fluctua pa luna, ta calcula e salario mensual dor di tuma e entradanan di e anja anterior y dividi esaki dor di diesdos luna. A base di e averahe cu sali ta determina si e Ordenansa Laboral ta aplicabel of no pa e trahador den e siguiente anja. 


3. Mi dunador di trabou por dicidi di pagami overtime den timeback enbes di placa?

Esaki ta posibel solamente si esaki a wordo cumbini por escrito p.e. den bo contrato laboral, CAO of pa medio di un memo cu adelanta e trahador ta na altura cu e lo ricibi overtime den timeback.


4. Mi dunador di trabou por obligami traha overtime?

Overtime ta obligatorio si esaki a wordo cumbini den contrato laboral of CAO. Si esaki no ta e caso ta keda na e trahador si e ta bai di acuerdo pa traha overtime. Por tin casonan di emergencia caminda e dunador di trabou lo haci un peticion riba e trahador pa traha overtime y cu si e trahador no tin un motibo valido lo no ta rasonabel di e trahador pa nenga di haci esaki.


5. Mi ta traha riba un dia di fiesta, con mi mester wordo paga?

Pa sectornan horeca, casino y continuo (p.e. hospital/airport) un dia di fiesta por ta un dia normal di trabou. Trahadornan cu ta riba schedule pa traha e dia aki tin derecho riba pago na 200%. Si riba e dia aki tambe mester traha overtime e oranan extra ta bai na 250%. Pa e otro sectornan p.e. comercio en general, construcion un dia di fiesta ta wordo considera como un dia di sosiego y si nan wordo pidi pa traha riba e dia aki nan tin derecho riba pago na 250%. 


6. Si mi dunador di trabou no ta cumpli cu mi 11 ora di shortchange y e ta jamami pa bin traha mi tin derecho riba overtime?

Den caso cu dunador di trabou no ta cumpli cu e shortchange, pues entre 2 shift mester tin por lo menos 11 ora di sosiego, e tin cu pagabo e oranan cu bo ta traha den bo shortchange na overtime.


Landsverordening Minimumlonen

1. Con ta calcula e tarifa pa ora pa un trahador cu ta gana salario minino?

E tarifa pa ora di un trahador cu ta traha 40 ora of mas ta wordo calcula dor di tuma e salario minimo pa siman stipula dor di gobierno (afl. 399,10) y dividi esaki dor di e oranan cu ta traha pa siman den e sector p.e. 40 ora/ 42 ora/ 45 ora.


2. Si mi salario ta consisti di un salario basico plus points/comision, e salario basico mester ta por lo menos salario minimo?

Esaki no ta corecto. Salario por consisti di diferente componentenan y no necesariamente e salario basico mester ta salario minimo. Si ta asina cu si tabata slow/benta no a bai bon y e trahador no ta jega e salario minino e dunador di trabou mester cubri e resto di salario y paga por lo menos e salario minimo na e trahador.



Landsverordening ter beschikkingstelling arbeidskrachten

1.Mi ta un uitzendkracht y mi ta bai haci 1 anja trahando na e mesun compania, despues di 12 luna mi ta bira vast na e compania?

E periodo maximo di 12 luna a cuminsa conta desde 1 juli 2013 pues  1 juli 2014 e promer periodo maximo di 12 luna lo vence. Si un uitzendkracht ta jega e periodo maximo di 12 luna, e dunador di trabou tin diferente opcion. E por ofrece e uitzendkracht un contract vast of e por duna un otro persona un contract pero esaki no por ta un uitzendkracht of e lo mester sera e vacatura aki pa un tempo. 


2. Mi ta trahando como uitzendkracht na un compania pa 3 luna y e compania kier ofrecemi un contract vast pero e uitzendbureau kier cobrami un boet, nan mag di haci esaki?

No, un uitzendbureau no mag stroba un uitzendkracht pa wordo tuma den servicio dor di e compania na unda e ta trahando pues un clausula den e contrato cu e uitzendbureau cu lo mester paga un boet si kier bai traha cu e compania direct ta nulo.



Burgerlijk Wetboek Aruba

1. Te cuanto biaha un dunador di trabou mag di duna un trahador un contrato laboral pa tempo defini?

Si 2 contrato laboral ta sigi otro sin cu a interumpi esaki cu por lo menos 3 luna, e di 3 contrato ta wordo considera como uno pa tempo indefini.

Si 2 contrato laboral ta sigi otro y ta surpasa 3 ana sin cu a interumpi esaki cu por lo menos 3 luna, e di 2 contrato aki ta wordo considera como uno pa tempo indefini.


2. Un dunador di trabou mag di cambia mi orario di trabou of baha e cantidad di oranan cu mi ta traha?

Un dunador di trabou no mag di haci cambio na e condicionnan laboral unilateralmente pues sin jega na un acuerdo mutuo cu e trahador.


3. E pago di salario durante ao pa por lo menos 6 siman ta pa full e anja?

No, esaki ta in principio pa cada bes cu e trahador bira malo. Si dentro di 4 siman e trahador meldziek pa e mesun motibo e periodonan por wordo conta hunto pa jega e 6 siman. Na momento cu e trahador jega e periodo di 6 siman malo, esaki por ta ininterumpidamente of dor cu a conta su periodonan di malesa hunto dor cu e la bira malo dentro di 4 siman, su derecho ariba full salario ta caduca.


4. Ora mi jega edad di pensioen mi tin cu stop di traha?

Ora un trahador jega edad di pensioen no necesariamente e mester stop di traha. Cu e cambionan di e leynan laboral a bira posibel pa pone un clausula di pensioen den un contrato laboral. Un clausula di pensioen ta un acuerdo den un contrato laboral of CAO cu ta stipula cu e relacion laboral ta termina automaticamente na momento cu e trahador jega un edad di pensioen. Un clausula asina ta legal solamente pa contratonan sera despues di dia 1 april 2013. Si den un contract sera prome cu dia 1 april 2013 tin un clausula asina esaki no ta valido.

Personeelsregister 2017-2018